Фархунда бод Наврӯзи оламоро!
Пеш аз ҳама муборак ба Хуршеди Тобон, ки имрӯз дар чархиши муназзами коинот дар марзи роҳи нави хеш қарор гирифт. Сипас табрик бод ба Замин, ки пас аз моҳҳои безурётӣ ва хазону яхбандон акнун обистани орзу шуд. Ба ҳазрати деҳқон, ки шукри офтобу нуру гармӣ мегӯяд ва донаи умед дар замин мекорад. Ба ҳар яки Шумо, хонандагони ин торнигор, ки бо ҳам рӯзҳои сарду сиёҳи зимистонро паси сар кардем. Наврӯз муборак!
Хуҷаста бод Наврӯз ба бемороне, ки пас аз авҷи дардҳои хеш дар пирию афсурдагиҳои фасли сармо ва ғалаёни эҳсоси барбастани рахт дар вопасин нохунхароши хокҳои яхбастаи роҳи қабристон аз меҳрубонии Худо ба баҳори нав расиданд ва дигарбора дар чашми онҳо ишқи зиндагӣ дурахшид, дигарбора умед мисли муғчае дар шохаи хушкидаи дарахти умри онҳо бишукуфт.
Оне ки ба баҳор расид, то зимистон умр хоҳад дошт. Худованд бо Наврӯз ба ӯ чунин паём дода. Боз бишаванд дилҳои баста ва тилисми бемориҳо. Худованд бо Наврӯз ба онҳо шифо фиристад. Ва умру бақо. То баҳори дигар ва баҳорони дигар.
Наврӯз муборак ба модаре, ки моро зоду парвард ва аз пойи равони мо ба ӯ фақат ғубори ғаму дарди ҳиҷрон мерасад. Хушо, ки ба Наврӯз ёдаш кунем ва дилашро шод ва омурзиш бихоҳем аз ӯ барои дил ниҳодан ба ҷодаҳои хоро ва мулки бегона.
Шод бод Наврӯз ба мусофирони раҳдур, ки дар ҳар куҷои олам бошанд, дар беҳтарин лаҳзаҳову бадтарин лаҳзаҳои умр ёди ватан мекунанд ва дар фосилаи байни ин ду ёди хоҳару бародар ба дарди дили онҳо меафзояд ва ҳам ин дардро сабуктар мекунад.
Фаррухпайк бод Наврӯз ба ошиқоне, ки ҳама чизи атроф барояшон ҳамеша ҷилои наврӯзӣ доштаву дорад ва тақвиме нест набояд ишқи онҳоро ва Наврӯз аст онҳоро имрӯзу ҳама рӯз, ҷовидона.
Фархунда бод Наврӯз ба парандаҳои муҳоҷир, ки ба кошонаи пурҳасрати хеш баргаштаанду меҳру нишоти нав ба он овардаанд. Дуруд ба шукуфаҳои наврӯзӣ, ки ҳаворо атр бахшиданд ва салом ба боди наврӯзӣ, ки дуду меҳро парешон кардааст.
Шоиста бод Наврӯз ба болонишинон, ки дар ин рӯз поён биёянд ва ҳамнаво бо мардуми хеш бошанд, ҳамдард, ҳамнафас, ҳамсафар, ҳамдил ва ҳамкор. Бадиҳо фаромӯш, некиҳо тоҷи сар, аз сафҳаи сафед то рангорангии гулҳо, ростӣ ва дурустӣ, некӣ ва дӯстӣ. Худоё, шифо, бақо, барор, ҳамҷӯрии ҳама бо ҳам ва ҳамагон бо ҷаҳоне, ки офаридаӣ, ҳидоятамон кун.
Ин номаро, ки аз дӯсте расида, низ ин ҷо насб мекунам:
3 Comments »
Leave a Reply
Муаллиф
Салими Аюбзод дар Бахши Тоҷикии Радиои Озодӣ кор мекунад. Муаллифи чанд китоб ва ду филми мустанад дар бораи Тоҷикистон аст. Дар оғози солҳои 1990 сардабири ҳафтаномаи “Чароғи рӯз” буд. Аз соли 1995 дар Праг кору зиндагӣ мекунад. Ин торнигори хусусии ӯст ва баёнгари мавзеъ ё дидгоҳҳои Радиои Озодӣ нест.
Facebook
Парчамшумор
Ҳоло бо мо
Гуед ба Навруз ки наояд ба ин мулки гуломон!
Устоди арчманд!
хаммаслакони гиромикадр!
Фарорасии Наврузи хучастамакдам ва фаррухфолро, ки чашни эхёи зиндагони ва тачаммули бахори нозанин дар саросари Ачам аст, ба Шумо самимона тахният гуфта, бароятон саодати рузгор, офияти пайваста, икболу манзалати оли, комрониву комгорихои хамешагиро таманно мекунам.
Чашни Наврузи Ачам башоратовари паёми чонфизои Бахори хучастафол ва рамзи тулуъи хуршеди оламафруз ва чахонорост, ки дар тадовуми фурсатхои сабзу шукуфо ба зиндагонии мардумони ориётабор нуру зиё, шукуху сафо, гулистони назокату латофат ва чамани орзухо эхдо оварда, моро ба фардохои пур аз максуд ва фуруги абадипартави саодат мепайвандад. Ин чашнвораест, ки аз рузгори чамшеди Каёни ибтидо гирифта, дар тамоми масири таърихи аквоми эронитабор хамагуна тахдиду фишорхои таърихро ба сарбаланди тахаммул карда, то имрузи фурузону дурахшони мо хамчун рамзи човидонагии мероси Ачами бузург аз гирдбодхои пурталотуми таърихи инсоният махфуз мондааст. Ин аст, ки то кунун тамоми мардумони Ачам бо хастии ин суннати деринаи ачдоди ва чашни шукуфоиву нусрат ва нузхати табиат алами ифтихор барафрошта, Наврузи некпайро тимсоли дустиву иттиход ва нишони вахдати мардумони сарзамини Ачам шинохта меоянд.
Бори дигар Шумо хамзаминону хамзамонон ва хамзабонони арчмандро ба муносибати ин чашни хумоюну фархунда самимона тахният гуфта, бароятон шукуфоии тоза, нусрату нузхати хамешаги дар зиндагони ва мачмуи хушихои рузгорро таманно намуда, дасти дуои хайре мекушоям, ки
Эй Худованди замину осмон,
То ба Наврузи дигар моро расон!
Наврузи хучастакадам муборак!
norooz bar hameye shoma mardome sharif mobarak bad
in ghalam serilik ra ma iranian nemitavanim hargez bekhanim.dari ra be ghalame english benevisied ta ba ham betavanim ertebat bargharar konim
ba tashakor