Ёдгори умри падар (Видео)

Хотираҳои маро дар бораи падарам, додарам Илҳомҷон, писари хурдӣ ва нонори падар идома медиҳад. Наврасии ӯ ба замони ҷанги шаҳрвандии Тоҷикистон рост омад ва вазъи бади иқтисодии кишвар дар қатори садҳо ҳазор нафар ӯро низ ба муҳоҷири мавсимие дар Русия табдил дод. Вай дар номаи аввалаш хотираеро ба ин гуна овард.

Марсияи носуруда

Ҳар сол 15-уми май бомдоди ман торику боронист. Айнан монанди ҳамон субҳи соли 2002-ум, вақте падарам аз ин дунёи фонӣ реҳлат карданд. Моро гузоштанду рафтанд. Дар айни камолот, дар синни 67-солагӣ ва дар ҳоле ки мебоист, боз солҳои зиёде соябони сари мо, фарзандонашон мебуданд. Дару девори хонаи мо бекасу бесарпараст монд.