Ангошту анбошти идона

Мехоҳам, ду идро, ки имсол болои ҳам омадаанд, ба ҳамаи хонандагони ин торнигор табрик гӯям. Яке — Рӯзи истиқлолияти миллии Тоҷикистон ва дигаре — иди Рамазон. Танқиду тамасхури бархе аз соҳибназаронро дар мавриди истиқлолияти давлатии тоҷикон шунидан сахт аст, аммо бояд дарк кард, ки зимни ин онҳо аз ҳукумати феълии кишвар интиқод мекунанд ва ба ҳоли раҳбарони нотавон тамасхур мезананд ва аз он ҷо ки ҷасорати фошгӯӣ надоранд, алами худро аз истиқлолият мегиранд.

Рамазон расидааст…

Рӯзи аввал аз як сӯ бисёр шодмона буд ва аз сӯе ҳам бисёр сахту дароз. Аммо гузашт ҳамонгуна ки рӯзҳову ҳафтаҳову моҳҳо мегузаранд. Гузаштанаш ҳам дигар буд ва аслан шабеҳи рӯзҳои рафта набуд. Рӯзи комилан дигаре буд рӯзи нахусти моҳи шарифи рамазон…

Рӯзе буд, ки дар он ҳолати ғайриодие ба кас даст медиҳад. Худро хеле қавӣ ва сабук ҳис мекунӣ ва ҳамаи ҳиссиётат тоза мешавад.