Нӯшатон бод пирӯзӣ, устод Бармак!
Филми Сиддиқи Бармак дар ҷашнвораи байнулмилалии Ботумӣ ҷои аввалро гирифт. Як рӯз баъдаш, дар озмуни Приштина Бармак барои ҳамин филм беҳтарин коргардон дониста шуд. Пештар “Ҷанги тарёкӣ” дар ҷашнвораи Рум ҷои аввал ва Ҷоизаи тилои Марк Аврелийро гирифта буд. Филми қаблии Бармак, “Усома” ба Ҷоизаи ҷаҳонии “Глобуси тило” мушарраф гаштааст.
“Ҷанги тарёкӣ” саропо шеър аст. Бандҳое аз он марсия, бандҳои дигар ҳамоса ва бандҳое ҳам танз. Ҳар ашёву симое, ки дар он мебинем, бештар аз ашёву симост ва дар ниҳояти амр ҳар яке аз онҳо ба рамзу символи пургунҷоише табдил меёбад.
Достони филм сода аст. Ду сарбози захмии амрикоӣ, ки чархболашон суқут кардааст, як хонаводаи бенаво, ки дар зиреҳпӯши тахрибшудаи паҳлуи киштзори хашхош ба сар мебарад, як навраси ин хонавода, ки маҷбур аст, онро идора ва таъмин кунад, як пирмарди босалобати маълули дузана, дастаи Толибон, ки бурқаи занона бар тан ба ин хонавода ҳамла мекунад ва гурӯҳи мубаллиғони интихоботӣ бо сандуқҳои рой — ҳама дар маҳдудаи танге ба ҳам меоянд.
Зиндагӣ дар дохили зиреҳпӯши тахрибшуда ишора ба зиндагии мардуми Афғонистон аст. Занону кӯдакон одат кардаанд, дар ин зиреҳпӯш ва хандақи зери он зиндагӣ кунанд. Наздик ба 30 сол аст, ки чунин зиндагии як кишвар идома мекунад. Дар поёни филм чархбол ин зиреҳпӯшро ба ҳаво мебардорад. Гӯё решаҳои онро аз ин хок бармеканад ва нури хуршед ба сари занону кӯдакон, ки то ҳол зери бори сангини ҷанг ба сар мебурданд, мерезад.
Манзараи сюрреалистӣ бештар ба орзуи дерина мемонад.
Киштзори хашхош иқтисоди хонавода аст. Хоҳед дид, ки майдони хашхоши шукуфон чӣ манзараи зебоест. Гулистон. Танаҳои тирасабз ва гулҳои бунафш.
Дертар қатори занонро хоҳем дид, ки зери бурқаҳои тирасабз меоянд ва дар сар буғча ё тугунчаҳои сурху бунафш доранд. Ду манзара ба ҳам меомезад. Одамон ва рустаниҳои бангдона. Одамон бурқаҳоро аз сар мегиранд ва маълум мешавад, ҳамагӣ толибҳои мусаллаҳу сияҳпӯшанд. Зоҳир ва ботини киштзори хашхош?
Ҳамин табдили берун-дарун дар саҳнаи дигаре низ ҳаст. Кӯдакон аз дур мебинанд, ки мошини бузурге ба сӯи онҳо дар ҳаракат аст. Аз наздик мебинем, ки мошинро як пода гов мисли аробае кашола мекунанд.
Дар даруни зиреҳпӯши тахрибшуда гаҳворае овезон аст. Кӯдакон дар даруни ҷанг зода ва парварда мешаванд. Вақте афсари сафедпӯст ва сарбози сиёҳпӯсти амрикоӣ дар бораи кӯдакияшон ва падару модарашон сӯҳбат мекунанд, дар як гӯшаи намо ҳамин гаҳвора ба чашм мехӯрад, ки холист.
Кӯдакон ин ду низомиро бозӣ-бозӣ ба ҷое мебаранд, ки ҳарду ба чоҳ меафтанд. Ин чоҳ дар қабристонест, ки дар як гӯри он сарбозони бритониёӣ, дар дигарш рус дафн шудаанд. Афғонистон қабристони нерӯҳои хориҷист?
Симои марказии филм наврасест, ки ҳам кӯдакон ва ҳам занони хонаводаро раҳбарӣ мекунад ва ба падари хонавода — пирмарди маълул низ ақл нишон медиҳад. Забони ин наврас забони шахси бузургсол аст ва фаҳмишаш низ. Кӯдаке, ки дар ҷанг зода мешавад, пеш аз вақт бузургу доно мегардад ва кӯдакие нахоҳад дошт.
Интихобот дар зери мили силоҳ ва бо тарсу ҳарос як саҳнаи танз аст. Номзад сандуқи раъйдиҳиро ба назди аҳли хонавода меорад, вале ӯро даҳҳо нафари мусаллаҳ иҳота мекунанд.
Ба сурати умум филми “Ҷанги тарёкӣ” саргузашт ва сарнавишти як кишвареро ба номи Афғонистон ба намоиш мегузорад. Ҳар яке аз қаҳрамонони он, ҳатто пирамарди босалобат, вале маълул ба рамзи ин мамлакат табдил меёбанд.
Дар бораи филми нави Сиддиқи Бармак чанд моҳ пеш дар Анҷумани синемогарон ва рӯзноманигорони форсизабон дар Лондон бо ӯ мусоҳибае доштем, ки он замон танҳо як бахши хабарияш пахш шуда буд. Ҳоло пайти муносибест барои пахши комили ин мусоҳиба. Нахуст аз ӯ пурсида будем, ки филми нави худро чигуна муаррифӣ мекунад:
“Ин филм, ба назари ман, дастоварди муштараки гурӯҳе аз филмсозон аст, ки бо як дилу як садо ҷамъ шуданд ва ин филмро сохтанд. Ин одамон аз ҳар гӯшаи дунё буданд. Масалан, аз Тоҷикистон, Эрон, Ҳинд, Амрико, Афғонистон… Барои онҳое, ки аз Тоҷикистон, Эрон ва Афғонистон буданд, ба шарофати забони муштарак мушкиле дар тафоҳум набуд, вале онҳое, ки инглисӣ ё ҳиндӣ сӯҳбат мекарданд, ҳеҷ вақт ҳисси бегонагие надоштанд. Ва ин буд, ки онҳо тавонистанд, аз таҳти дил ва самими қалб як кори хуберо анҷом диҳанд.”
Пурсиш: Шумо аз филме, ки дар ниҳояти кор омода ва ба бинанда пешкаш шуд, ҳамчун коргардони он розӣ ҳастед?
Сиддиқи Бармак: “Ба сурати куллӣ, оре. Аммо бо гузашти замон ҳиссе пайдо мешавад, ки кош, ин қисматашро ба як шакли дигаре месохтам, кош ин тағйиро меовардам, кош, ин порчаро кӯтоҳтар месохтам ва он якеро дарозтар, кош ин ҷо рангҳоро тағйир медодам. Ин фикрҳо пайдо мешаванд, вале ба ҳар сурат ман розӣ аз инам, ки бо вуҷуди он ки як тими бисёр мухталиф аз ҳар гӯшаву канори ҷаҳон ба ҳам омада буд ва чунон бо ишқ кор карданд, ки натиҷаашро Шумо рӯи парда дидед.”
Пурсиш: Филмҳои Шумо як ҳолати эксперименталӣ, ҷӯяндагӣ ва навоварию навпардозӣ доранд. Интизори Шумо аз вокуниш ба навпардозиҳо чист?
Сиддиқи Бармак: “Ман вақте ки филм месозам, бештар ба садои дили худам гӯш медиҳам, ки оё пазируфтанӣ ҳаст, оё худи маро мутаассир месозад, худи маро такон медиҳад. Вокуниши худам ба он чӣ хоҳад буд? Бовар ва нобовариҳои ман ба он чист? Баъд ба мардуми худам фикр мекунам, ки метавонанд, бинандаи ҳамин филм бошанд. Бештар ба ин мавзӯъҳо меандешам ва фикр мекунам, ки мехоҳам, куллан муаммои печидаи инсонҳоро матраҳ созам. Ҳаводисе, ки инсон меҳвари он аст ва равобити печидаи инсонҳо матраҳ мешавад, дар ҳама ҷо бинанда хоҳад дошт. Агар мо мушаххасан ба як макон ва як замон таъкид бикунем, шояд филми мо дерпо набошад, шояд зуд фаромӯш шавад ва бинандаи ҷаҳонӣ надошта бошад. Қисме ки мебинем, бузургтарин дастовардҳои адабиёти ҷаҳонӣ онҳое ҳастанд, ки дар бораи инсон ба таври маҷмӯъ сӯҳбат мекунанд. Шумо осори Мавлони бузургро бубинед. Ё ашъори Ҳофизу Саъдию Рӯдакию Хайёмро бубинед, ки чӣ қадар ом ҳастанд, маҷмӯъӣ ҳастанд, дар бораи инсон ҳарф мезананд ва ба ҳамин хотир мондагор ҳастанд. Ё масалан, аз адабиёти клоссики рус бигирем, ончӣ дар осори Толстой, Чехов, Достоевский дида мешавад, ҷолиб аст. Ин инсонҳои бузургро тамоми нигоҳашон ба инсон аст. Инсон дар замон ва муҳити лоятанҳоӣ. Ба ҳамин хотир аст, ки осорашон мондагор аст. Мо ҳам ҳамчун шогирдони кӯчак кӯшиш мекунем, ин меъёрҳоро дар филмҳои худамон ба гунае матраҳ бисозем ва бештар таваҷҷӯҳи мо ба сарнавишти инсон, инсон бо тамоми абъодаш, бо тамоми зовияҳояш бошад. Шояд гоҳе вақт муваффақ шавем ва гоҳ на, вале ман фикр мекунам, ин улгуҳо, ва намунаҳои бисёр хубест, ки метавонад одам дар синемо ҳам пиёда бикунад.”
Пурсиш: Филми Шумо саросар рамз аст. Чунончи, тонк дар паҳлуи гаҳвора ва ё об дар биёбон. Омезиши рангҳо ва суробҳо. Ин забони синемоии Шумост. Фикр намекунед, ки шояд барои як бахши бинандагон ин забон начандон фаҳмо бошад?
Сиддиқи Бармак: “Замоне ки филмро месохтам, аввал фикри инро доштам, ки ривоятгари содаи як қисса бошам. Достонеро ривоят кунам, ки бисёриҳо битавонанд, онро ба унвони як қиссаи сода бипазиранд ва дарк бикунанд. Вале дар паҳлуяш, бидуни шак, чашм намепӯшам аз ин ки бештар ба истиора, киноя ва имову имож фикр кардаам. Яъне мо ҳарду буъди бинандаи худро дар назар гирифтем. Барои бинандае, ки бисёр амиқ ба синемо наменигарад. Мисли он ки дар Афғонистон аксаран мо, мутаассифона, бинандаи бисёр амиқнигар надорем. Саводу дониш дар тӯли солҳои ҷанг, чунон, муатаассифона, ба сатҳи поин ва нозил расидааст, ки бинандаи мо ё одат карда ба филмҳои нозили ҳиндӣ ё ҳолливудӣ, ки мо бояд барои ӯ як ривоятгари сода бошем. Достони филм худаш ба шакли бисёр ҳам одӣ ва сода метавонад барои чунин бинанда қобили пазириш ва дарк бошад, вале дар паҳлуи он мо ба бинандае, ки жарфнигар аст ва бинандаест, ки дар масоъил думболи маънову мафҳум мегардад, низ паём дорем ба он гуна ки Шумо гуфтед, тонк сумбул аст, гаҳвора дар канори тонк сумбул аст, ба хусус замоне ки шаб сарбозу афсари амрикоӣ, ки ба тонк баста шудаанд, сӯҳбат мекунанд, ӯ дар бораи модараш мегӯяд. Мегӯяд, ки мехоҳад, бо падару модараш гап бизанад, зеро мегӯяд, ман фикр мекунам, ки набояд дар ин ҷо бимонам. Дар ҳамин ҳол дар композисюни куллии кадр ҳангоми ин сӯҳбатҳо мо ҳамчунин як гаҳвораи танҳову холиро мебинем. Ман фикр мекунам, нисбати cӯҳбатҳои инсон, зиндагии инсон ва сарнавишти инсон бо гаҳворае, ки аз оғоз дар он бузург шуда ва кӯдакиҳояш он ҷо гузашта як робитаи мустақим аст, биноан умқи мавзӯъро ба гунае хостем ба тарафи чанбӯъдӣ будани инсон ва чанбӯъдӣ будани тасвир ва дар айни замон чандмафҳума будани ҳарфҳои худамон бикашем.”
Пурсиш: Шумо гуфтед, як дастаи тифоқе аз филмсозони мамолики гуногун дуруст кардед. Кори муштарак идома хоҳад кард ва нақшаи баъдии Шумо чӣ хоҳад буд?
Сиддиқи Бармак: “Бидуни шак, ин даста ҳамонгуна ҳамдилу ҳамкор боқӣ хоҳад монд ва нақшаи баъдии ман ҳам инро тақозо мекунад. Сужа ва андешаҳои зиёде ҳаст. Ҳамаи онҳо ҷолибанд, вале ҳоло достоне дар даст дорам зери унвони “20”, ки як бахши ҳодисаҳои он дар Афғонистон иттифоқ меафтад ва бахши дигар дар Осиёи Марказӣ, бавижа дар Тоҷикистон. Бист як мафҳуми хос аст, ҳам ба унвони адад ва ҳам ба унвони як амале дар тавлиди маводи мухаддир. Мехоҳам, ин филмро боз ҳам бо кӯмаки ҳамин дӯстонам дар Тоҷикистон ва Афғонистон ба навор бигирам. Агар таҳиякунандаеро пайдо кардем, ки ба сармоягузорӣ дар ин барнома розӣ шуд, иншоаллоҳ, то сари соли оянда ин филмро оғоз мекунем.”
Бахше аз ин матлаб аввал дар сомонаи интернетии радиои “Озодӣ” нашр шудааст.
04.10.2009 - Posted by aioubzod | Синемо, Фарҳанг | Siddiq Barmak
1 Comment »
Leave a comment Cancel reply
Муаллиф
Салими Аюбзод дар Бахши хабарии РАО/РО барои Осиёи Марказӣ кор мекунад. Муаллифи китобҳои “Девор”, “Гунги хобдида”, “Сад ранги сад сол”, “Тоҷикон дар қарни бистум”, “Каме латра” ва филмҳои мустанади “Муҳоҷират”, “Бозгашти беохир”. Дар оғози солҳои 1990 сардабири ҳафтаномаи “Чароғи рӯз” буд. Ин торнигори хусусии ӯст ва баёнгари мавзеъ ё дидгоҳҳои РАО/РО нест.
-
Навиштаҳои нав
Blogroll
- Абдуазими Абдуваххоб
- Абдукодири Абдукаххор
- Абдулвохиди Зевар
- Акбари Турсон
- Армуғон
- Аъзами Хуҷаста
- Блоги Бахтиёр
- Блоги Ворис
- Бо Субҳон
- Бонувон
- Боргоҳи сухан
- Герби шердор
- Дилшода Фарҳодзод
- Камолиддин Абдуллоев
- Кимиёи саодат
- Маликнеъмат
- Мардикорнома
- Меъмор
- Наргис Қосимова
- Носирҷони Маъмурзода
- Ойина
- Орзу Карим
- Падида
- Пайкон
- Радиои Озодй
- Рӯзгор (Султони Ҳамад)
- Рӯзҳо ва розҳо
- Садои Кухистон
- Садоқат
- Салом, оянда!
- Соҳибёр Толиб
- Танзи Нахудак
- Тоҷикони номвар
- Тоҷнет
- Умеди Ҷайҳонӣ
- Фазлиддин Асозода
- Фаррухи Ҷаббориён
- Фирдавси Аъзам
- Хусрав
- Чароғи рӯзгор
- Шариф Муллоев
- Шӯҳрати Ҳазратшоҳ
- Эраҷи Амон
- Эроншаҳр
- Як дарвеш
- Mahbub – TJ
- Ҳабиб Саид
- Ҷовиди Муқим
- Ҷомеа
- Ҷӯра Юсуфй
- Prominent Tajik Figures
- Rustam Tj
- Samarqand
- Tajik Corner
- Tajik Press
- Tajikistan Jornal
- Tajikistan Photo
- TajikPersian
- Tales from Tajikistan
- Tоҷвар
- TojNews
- WordPress.com
- WordPress.org
Ҷустуҷӯ
Бойгонӣ
- April 2023 (1)
- April 2021 (1)
- February 2020 (1)
- March 2019 (1)
- February 2019 (4)
- December 2018 (1)
- November 2018 (1)
- October 2018 (2)
- September 2018 (2)
- August 2018 (1)
- July 2018 (5)
- June 2018 (2)
- May 2018 (1)
- April 2018 (2)
- March 2018 (1)
- February 2018 (1)
- January 2018 (2)
- December 2017 (1)
- November 2017 (3)
- October 2017 (1)
- September 2017 (3)
- August 2017 (2)
- July 2017 (4)
- June 2017 (1)
- May 2017 (3)
- April 2017 (1)
- March 2017 (1)
- February 2017 (1)
- January 2017 (2)
- December 2016 (2)
- October 2016 (1)
- September 2016 (4)
- August 2016 (2)
- June 2016 (1)
- May 2016 (3)
- April 2016 (1)
- March 2016 (2)
- November 2015 (1)
- October 2015 (1)
- September 2015 (1)
- August 2015 (1)
- May 2015 (1)
- September 2014 (2)
- August 2014 (1)
- July 2014 (1)
- June 2014 (1)
- March 2014 (5)
- January 2014 (1)
- December 2013 (2)
- October 2013 (4)
- September 2013 (2)
- July 2013 (2)
- June 2013 (2)
- May 2013 (3)
- April 2013 (2)
- March 2013 (3)
- December 2012 (1)
- November 2012 (4)
- October 2012 (6)
- September 2012 (1)
- August 2012 (3)
- July 2012 (4)
- June 2012 (1)
- May 2012 (2)
- April 2012 (4)
- March 2012 (3)
- February 2012 (1)
- January 2012 (4)
- December 2011 (3)
- November 2011 (5)
- October 2011 (5)
- September 2011 (5)
- July 2011 (5)
- June 2011 (5)
- May 2011 (10)
- April 2011 (5)
- March 2011 (13)
- February 2011 (1)
- January 2011 (2)
- December 2010 (7)
- November 2010 (6)
- October 2010 (6)
- September 2010 (7)
- August 2010 (9)
- July 2010 (5)
- June 2010 (5)
- May 2010 (5)
- April 2010 (5)
- March 2010 (5)
- February 2010 (10)
- January 2010 (9)
- December 2009 (5)
- November 2009 (5)
- October 2009 (2)
- September 2009 (7)
- August 2009 (9)
- July 2009 (10)
- June 2009 (7)
- May 2009 (11)
- April 2009 (12)
- March 2009 (14)
- February 2009 (5)
Шумориш
- 327,540 нигоҳ
Сарманзил
Писандидаҳо
-
Join 1,367 other subscribers
Нигористон
Тӯри бахшҳо
Вокунишҳо
- samo s on Ухабы от Петкеля
- Намунаи ношинохта « Салими Аюбзод on 12 феврали 1990. “Баҳманмоҳи хунин” ё “Генотсид”?
- Намунаи ношинохта « Салими Аюбзод on Тоҳири Абдуҷаббор ва “Растохез”-и ӯ
- Абдубосит on Асрори Асрорӣ
- Холик on Як суруди солҳои бистум
- А. Рустам on Нубуғи гурезони Шумо
- Д on Сказка о проклятии Тамерлана
Вожаабр
Abuhanifa Afghanistan Akbar Turson Avicenna Bukhara Central Asia China cinema Daler Nazar election Elections Farzaneh Fiction History IMF Imomnazari Kholnazar International Relations internet Islam journalism Kame latra Kenya Kyrgyzstan Mass-media Migrants Mirzo Ziyoev Muhammadjon Shakuri Nawruz New media New York Obama Olimpour pressa Putin Ramadan Roghun Russia Samarqand short story Tajikistan Tajik migrants Tajiks Tamerlan Tavildara Terrorism Tohir Abdujabbar Tohiri Abdujabbor U.S.A. Ukraine USSR Uzbekistan Zarnisor Адибони тоҷик Бӯҳрони ҷаҳонӣ Марг Матбуот Наша Раша Рогунский ГЭС Рӯзҳои гузашта СССР Садовничий Синемо Сухан Таджикистан Театр Украина Фарзона Фарҳанг Футбол Хотира журналистика мигранты ояндабинӣ рассказ тахайюлПарчамшумор
Ҳоло бо мо
Twitter
Facebook
Ман ин филмро дидаам. Филми диданиаст, вале факт барои як бор. Чунки он аслан идиюлужй баромадааст. Дар ин филм ман танхо хунари коргардонии окои Бармакро метавонам тавсиф намоям – хеле хунармандона. Дар ин филм, ростй, дасти коргардон эхсос мешавад. Вале он чиддй нест – он гуна, ки филми “Усома”-и у гирифта шудааст. “Усома”-ро ман 6 бор дидам ва агар имкон шавад, онро боз чандин бори дигар хохам дид. Вале “Чанги тарёк”-ро на.
Ба хар хол, Сиддики Бармакро бо ин пирузияш табрик мегуям, чунки у ба хар чоизаи баланде меарзад. Ва аз вай сохтани филми хуби хуберо умедвор шудан мумкин аст.
Comment by Мунаввар | 04.10.2009 |