Аввал дарвеш, баъд хеш

Ҳокими аёлати Ню Йорк Эндрю Гиёмо сардори Раёсати ҳолатҳои фавқулодаи ҳукумати ин аёлат Стивен Куарро аз кор пеш кард. Сабаб ин буд, ки Куар дар айни авҷи рафъи пайомадҳои тӯфони “Сэндӣ” зердастонашро ба манзили худ фиристодааст, то дарахти фурӯафтодаеро аз назди хонааш бардоранд. Ҳоким гуфт, вақте ин хабарро шунид, ҳамон сония фармони барканории Куарро имзо кард.

Хурӯсфарёди Ню Йорк

Ҳаргиз гумон намекардам, дар яке аз минтақаҳои марказии Ню Йорк бо садои хурӯс аз хоб бедор мешавам. Ин ҳам дар ҳоле ки дар Ню Йорк парвариши мурғ мумкин, аммо хурӯс манъ аст. Хилофи баробарии ҷинсҳо! Дубора хобам мебарад, вале баъдан мурғфарёди саҳар аз нав ба ёдам мерасад. Маълум мешавад, ҳамсояи мо мурғхона доштааст.

Дар оғозгоҳи бӯҳрони ҷаҳонӣ

Албатта, Ню Йорк на ҳамаи Амрикост ва ҳатто ба гуфтаи худи амрикоиҳо, аслан на Амрикост, вале таъсири бӯҳрони ҷаҳониро, ки гуфта мешавад, аз ҳамин ҷо оғоз ёфта, ба тамоми олам паҳн шуд, дар чашм, рафтор ва сарулибоси нюйоркиҳо дидан номумкин аст, ҳарчанд нишонаҳои бӯҳрон ин ҷову он ҷо намудор мешаванд.